Daar kom eintlik altyd ’n storie saam met elkeen van ons. Dis al lankal geskryf deur ’n Groter Hand, ons skryf net saam en kleur die prentjie in.

Makieriekraai is ’n klein besigheid met ’n storie wat ek nou help skryf …

Elke item is met die hand gemaak of het deur hande gegaan wat ook hul eie storie het, ’n storie wat ons nie noodwendig ken nie, dalk hande met baie myle op, dalk hande wat baie lief en leed ondervind het, maar dis hande van iemand wat leef daarvoor om ’n glimlag en opgewondenheid vir iemand anders te bring: ’n verjaardagmaatjie, ’n spesiale vriendin, ’n nuwe mamma wat met groot afwagting ’n langverwagte baba se kamer mooi maak of dalk net daardie vrou wat iets spesiaal nodig het na ’n emosiebelaaide dag.

My hoop is om iets mooi vir iemand te kan gee met die wete dat daardie geskenk net vir hom of haar bedoel is, spesiaal uitgesoek en verpak deur hande met ’n storie.